9 saliya govara Zevî

Berî 9 salan fikra weşandina govarekê di serê min wisa serî hilda. Di demeke ku bi rastî jî pêdiviya me bi derxistina govareke serbixwe ku her nivîskar cihê xwe tê de bibîne hebû. Ji xwe piştî rawestandina govara Zanîn ku xwedanê wê Ferhad Çelebî û Edulbaqî Huseynî bû, me nema karîbû cihekî li gor xwe bibînin. Govarên di wê demê de derdiketin jî di bin qedexeyike pir dijwar de bûn û carna bi salan jî hijmarek çap nedibû. Piraniya wan jî di bin baskê partiyên de bûn. Belkî ji ber banga yekmîn û pêşgotina hijmara yekemîn bû, ez wê ji we re di koşeya xwe de diweşînim. Belkî ev wek çavkanî bi kêrî dîroka vê govarê were.

Çima Zevî?

Xwendevanên rêzdar,

di afirandina çand û hunera kurdî de, em dikarin çi bibêjin?

Dema me da ber çavên xwe ku em ê Zeviyeke çandeyî biçînin, ji ber xwe ve ket hiş û ramana me ku wê cihê her ronakbîrî tê de hebe û bi serbestî ew ê karibe berhemên xwe tê de bibîne. Em bawer dikin ku ev pêwîstî xwesteka me hemûyan e, da ku deriyekî serbixwe û bêsînor li pêşiya me vebe, da ku em derbasî Zeviyeke rengîn bibin û keda xwe tê de bibînin. Herwekî mîna gulistaneke ku hemû rengên kulîlkan himêz dike. Ji mafê herkesî ye ku rengê xwe hilbijêre. Her weha me jî xwest li gorî xwe, roleke xwe yî dîrokî bilîzin, da ku em jî di warê xizmet û ragihandinê de bê par û pişk nemînin. Ango daxwaza me ew e, ku hunermend bi awazên xwe, wênekêş bi kevalên xwe, çîroknivîs bi serpêhatiyên xwe û helbestvan bi hestên xwe, vê Zeviyê bixemilînin. Em jî bi dilekî sozdar vê zemînê ji were raxînin.

Vêca banga me ji bo hemû nivîskar û ronakbîrên kurd bi taybetî, ku em ê li vê Zeviya xwe xwedî derkevin û bêdudilî xwe berpirsyar bibînin, da ku em bikaribin berhemên xwe yî buha jê paş ve nedin û dahînanên xwe  li rûpelan bibînin, da ku ev hevkarî bibe pêkanînek ji bo perçak ji hêviyên me û ji dûmana wendakirinê, pêşerojên me zelal û ronahî bikin.

Xwendevanên hêja,

hêviyên me ew in, ku hûnê jî li dora me sîwan bigrin, da ku em karibin mûmekê di şeveke bahozî de pêxînin. Hûn baş dizanin hêvî kûr û dûr in, lê astengî li derdora me pir in, dîwar û sînor danîne.

15.02.2001

Zevî - Hijmara (1)