Her ku ez di nava rûpelên malpêren kurdî de nûçeya kuştina jinekê dixwînim, hestên min bi kûranî tên sotandin û gelekî têm êşandin.

Naxwazim serê xwênerên xwe bi gotareke klasîk li ser mafê jinê û sedema paşdamayîna wê binivîsînim  û nejî bidim xwiya kirin bê çi pêwistî divê ku jin ji zordarîyê rêzgar bibin.

Tiştê ku bala min digişîne , gava ku bûyerek siyasî diqewime,  rûpelên malperan tijî nivîs û gotar dibin, lê gava ku gulek ji gulistana civaka me tê qurçifandin tu tiştekî ji bilî kurte nûçeyekê nabînî, lê ya herî girîng ewe ku nivîskarên me bi tirsonekî nêzîkî vê yekê dibin û bi newêrekî rexneya civakê dikin, ji xwe hêzên siyasî tiştekî nakin, ji bilî weşana wê nûçeyê.

Nizanim çima wa li ber dilê min kelîya ku divê mirov bêje werin em tiştekî neyî klasîkî bikin.

Eger bi rastî em dilşewatê paristina jinanbin divê em tiştekî bo sivikirina vê zulmê bikin.

Gelo wê çiqas xweşbe ku rewşenbîr û siyasetmedar û hemû kesên pêşverû di nava civakê de piştî kuştin yan xwekuştina jinekê xwepêşandanekê ji navenda bajêr bi rêkin û bidin xwiya kirin ku em li dijî kuştin yan xwekuştina jinanin û em van kiryaran şermezar dikin û li dij derdikevin .

Bi vê yekê wê helwest were xwiya kirin û bala civakê bê kişandin ku em ne razîne bi van kiryaran, lê gava ku hemû kiryar derbas dibin wek ku tiştek nebûye ev edet berdewam dike û zêdetir bibe.

Eger mirov tiştekî nikanibe biguhere, bi kêmayî divê nerazibîbûna xwe diyar bike.

Eger rewşenbîr û siyasetmrdar û hêzên pêşketî di civakêde li dijî vê qurçifandina gulan nesekinin, wê kî vê yekê bike.

Gelekî şerme ku di çerxê bîst û yekan de ji bo hezkirina di nava du kesan de mirovek bê kuştin.

Ta kengî wê jin werin kirîn yan firotin yan bi darê zorê bên dayîn û eger ew bêje na, gef lê werin xwarin û ev yek bibe sedema xwekuştinê yan xwe sewitandinê.

Divê em ne tenê îdî siyasetê bikin , divê em destên xwe bidin ser birînên civaka xwe, ne tenê bi nivîsandinan yan bi simînaran lê tiştekî li ber çavan bikin , tevî ku wê dilê hinek fewdal û êlperest û olperesrt û alîgirên wan ji me bimîne, lê divê ev yek bê kirin.

Bese bêdengîya li hember qurçifandina gul û kulîlkan.

14.02.2010